ឯកឧត្តម ខៀវ ភារិទ្ធ អញ្ជើញដឹកនាំកិច្ចប្រជុំបូកសរុបលទ្ធផលការងារប្រចាំខែមករា និងខែកុម្ភៈ ឆ្នាំ២០២៥ និងលើកទិសដៅបន្ត របស់ក្រុមការងារសហភាពសព័ន្ធយុវជនកម្ពុជា ក្នុងវិស័យមហាផ្ទៃ

ទីស្ដីការក្រសួងមហាផ្ទៃ ៖ នៅរសៀលថ្ងៃសុក្រ ទី២៨ ខែកុម្ភៈ ឆ្នាំ២០២៥ ឯកឧត្តម ខៀវ ភារិទ្ធ រដ្ឋលេខាធិការក្រសួងមហាផ្ទៃ និងជាប្រធានក្រុមការងារសហភាពសព័ន្ធយុវជនកម្ពុជា ក្នុងវិស័យមហាផ្ទៃ បានអញ្ជើញដឹកនាំកិច្ចប្រជុំបូកសរុបលទ្ធផលការងារប្រចាំខែមករា និងខែកុម្ភៈ ឆ្នាំ២០២៥ និងលើកទិសដៅអនុវត្តការងារបន្ត របស់ក្រុមការងារសហភាពសព័ន្ធយុវជនកម្ពុជា ក្នុងវិស័យមហាផ្ទៃ។

ក្នុងកិច្ចប្រជុំនេះដែរ មានការអញ្ជើញចូលរួមពី ឯកឧត្តម លោកជំទាវអនុប្រធាន និងឯកឧត្តម ប្រធាន អនុប្រធានក្រុមការងារ តាមបណ្ដាអគ្គនាយកដ្ឋាន និងអង្គភាពប្រហាក់ប្រហែល ក្នុងវិស័យមហាផ្ទៃ រួមទាំងក្រុមការងារលេខាធិការដ្ឋានផងដែរ។

បន្ទាប់មកឯកឧត្តមមានមតិសំណេះសំណាល និងអនុញ្ញាតឱ្យកញ្ញា ទី វ៉ាន់នី ប្រធានលេខាធិការដ្ឋាន ធ្វើសេចក្តីរាយការណ៍សង្ខេបជូនអង្គប្រជុំអំពីលទ្ធផលការងារដែលបានអនុវត្តកន្លងមក និងលើកទិសដៅការងារបន្ដរបស់ក្រុមការងារ ស.ស.យ.ក.ក្នុងវិស័យមហាផ្ទៃ ព្រមទាំងធ្វើបទបង្ហាញអំពីដំណើរការរៀបចំកម្មវិធីរត់ពាក់កណ្តាលម៉ារ៉ាតុង នៅខេត្តកែប ដែលនឹងប្រព្រឹត្តទៅនាថ្ងៃទី៨ខែមីនា ឆ្នាំ២០២៥ខាងមុខនេះ ដើម្បីចែករំលែកជូនអង្គប្រជុំជ្រាប។

ជារួមអង្គប្រជុំបានឯកភាពជាឯកច្ឆន្ទទៅលើរបាយការណ៍ទាំងស្រុង។ ជាមួយគ្នានេះ ឯកឧត្តមប្រធាន បានថ្លែងកោតសរសើរនូវការចូលរួមអនុវត្តសកម្មភាពនាពេលកន្លងមក និងលើកទឹកចិត្តដល់បណ្តា ស.ស.យ.ក.អគ្គនាយកដ្ឋាន ឱ្យបន្តបង្កើនសកម្មភាពនានាដើម្បីបម្រើដល់ប្រយោជន៍ដល់សង្គមជាតិ ពិសេសការចូលរួមបរិច្ចាគឈាម ដែលគ្រោងយរៀបចំនៅត្រីមាសទី២ឆ្នាំ២០២៥ខាងមុខនេះ។

ប្រភព៖ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ